Current track

Title

Artist


Tin preshon pa saka miónes fo’i CDI manda Invest Curacao

Written by on 28 January, 2020

Punda—Ta definitivo ku gobièrnu ulandes kier influensha kon tei kapitalisá e banko Invest Curacao. Invest  Curacao, ta e instituto kual mester bai hañá un pèrmit bankario i via dje pèrmit lo bira posibel invertí fondonan konforme e Akuerdo di Kresementu.

Ta trata di por lo ménos 300 mion florin i tin hopi “tribon” na kosta. Ulanda lo pone 180 mion, miéntras benta di UTS mester trese 60 mion i despues di konkretisá 34% den benta di CPA, un suma adishonal di 60 mion mas lo bini aserka. E parti di Ulanda no ta konosí ainda for i kua fondo e ulandesnan lo laga depositá nan parti, pero no mester ekskluí e ròl di Invest NL den esaki. Mediante  artíkulo 5 sekshon A den e Akuerdo di Kresementu firmá, Ulanda a instruí Kòrsou, pa kapitalisá e instituto Invest Curaçao. Esaki lo duna Kòrsou derechi pa fia for di fondonan ulandes, un suma di 180 mion florin repartí den 3 aña. Invest Curaçao tei risibí e suma di 180 mion pa yuda stimulá ekonomia via di e kuenta di kapital. Ademas, Invest Curaçao tei risibí adishonal 60 mion florin for di e benta di UTS. Den mesun artíkulo, insiso 3, Ulanda ta instruí Kòrsou pa sigui kapitalisá Invest Curaçao, for di tur medionan originá mediante benta di propiedat i kompanianan anónimo gubernamental. Esaki ta enserá tambe e.o. 60 mion fo’i benta di CPA. Lokual ta remarkabel i kuestionabel den hinter e struktura ta e desishon pa laga ulandesnan oropeo bin forma un struktura igual na Ulanda tin, Invest NL. Na Kòrsou, tin establesé pa hopi aña kaba, Korpodeko, OBNA i hasta a lanta CDI pa mesun meta. Den e forma aki a keda kumbiní ku tur benta dia akshonnan di UTS ta wòrdu depositá riba kuenta di CDI unda despues lo bini repartishon na e banko unda ulandesnan ta konsehando minister Gijsbertha i Mc William.  Kontenido di e repartishon no ta konosí, pero ta papiando di 40-40-20 %, konforme konseho di PMO Akuerdo di Kresementu. PMO i ministernan den kabinete mester a duna proposishonnan konkreto riba proyektonan i programa ku ta bini na remarke pa kuminsá “kome” fo’i ku tei subi riba kuentanan di Invest Curacao.
Invest Curaçao ta bira un kopia modelo di e sistema Invest.NL.  Ekspertonan envolví den Invest.NL ta formando e malchi organisatorio pa ehekushon di Invest Curaçao. Segun artíkulo 5 den Akuero di Kresementu, ta Invest Curaçao tei bira e instituto pa kontrolá invershon  prosedente di fondonan gubernamental. Atraves di un agènda di invershon (insiso 2), kada 6 luna Kòrsou mester presentá proyektonan ku ta bini na remarke pa stimulashon di ekonomia. Esaki tampoko te ainda no a konkretisá. Invest Curaçao tei kai dirèkt bou di supervishon di Banko Sentral. Rijksdients voor Ondernemend Nederland (RVO) tei keda enkargá pa forma i vigilá e instrumento i struktura di garantia relashoná ku e bolsa di fiansa aktivá serka Invest Curaçao. Manera ya menshoná e promé fase pa kapitalisá Invest Curaçao ta mediante 60 mion florin prosedente for di benta UTS. E instrumento di garantia, manehá pa RVO, ta determinante ehekushon di e proyektonan proponé. Te intenshon pa laga Invest Curaçao, kontrolá despues maneho na Korpodeko, OBNA i tambe CDI.



Reader's opinions

Leave a Reply

Your email address will not be published. Required fields are marked *