[There are no radio stations in the database]

POLIS A PARA PARTIDO KUMUN KU YENAMENTU DI BURAKU

Written by on 15 January, 2021

WILLEMSTAD.- Polis a para partido KUMUN pa sigui yena burakunan den kaya. Djárason a bira konosí ku partido KUMUN a disidí di kumpra un trùk di asfalt i a kuminsá asfaltá kamindanan yená ku buraku.

Despues di e promé dia, partido KUMUN a manda pidi 2 trùk di asfalt mas (12 tòn) pa asina por a kontinuá na otro barionan inkluso Bándabou. Pero lástimamente mester a kanselá e pedido. Esaki a kai manera un baño di awa friu serka e partido i su miembronan mirando ku e yenamentu di buraku sigur a aliviá hopi outomobilista i a kai den hopi bon tera.

Lider di Partido KUMUN a indiká na Ons Radio Curacao ku nan a komprondé ku polisnan a prepará un karta pa e partido indikando ku nan mester para tur e moveshonnan aki debí ku esaki ta ilegal. Dado kaso nan sigui hasié tòg, lo konfiská tur material inkluso e trùk ku ta transportá e asfalt. Pero te ainda e karta no a yega serka nan.

Esaki ta nifiká ku lo no tin yenamentu di asfalt ni di Partido KUMUN ni di ningun otro persona en partikular. Pues mester warda te na momentu ku Gobièrnu mes atendé ku tur kaminda malu i burakunan riba kaya.


Reader's opinions

Leave a Reply

Your email address will not be published. Required fields are marked *



Continue reading