[There are no radio stations in the database]

Ònderstant tin di bira 1100 florin

Written by on 28 January, 2021

Konforme parlamentario independiente pa Partido Trabou Pa Kòrsou (TPK) sr. Rennox Calmes, e montante aktual di ònderstant tin di subi i bira 1100 florin pa luna. Aktualmente e montante di ònderstant ta 162,40 pa kinsena (kada 2 siman). Na Calmes su pareser un hende lo no por hiba un bida digno ku e montante aki. Konforme Calmes e montante aki no ta yega pa nada di mundu.

“E hecho ku un kobradó di ònderstant mester biba for di e montante aki ta trese hopi konsekuensia sosial ku n’e”, sigun Calmes. “Ehèmpelnan ta muchanan ku no por konsentrá òf siña bon na skol debí ku nan tin hamber. No únikamente esaki tin konsekuensha pa nan prestashon na skol pero tambe pa nan salú. E hecho ku un persona no ta disfrutá di un dieta bon balansá por tin konsekuensha médiko tambe, manera problema ku stoma, preshon haltu óf obesitas. E problemátika aki pa ku salubridat lo tin konsekuensha negativo pa e fondo sosial di SVB i tambe e kadena hudisial a largo plaso.” 

Pa bini bek riba e parti di montante di e onderstant, konforme Calmes tin diferente manera kon pa ahustá e montante aktual. Tin por ehèmpel diferente impuestonan ku nunka a wòrdu kobrá manera ‘logeergastenbelasting’, okupason ilegal di tereno ku no a wòrdu atendé èts. Banda di esaki ta bini aserka ku Transparency International a konstatá konforme un rapòrt ku 20% di e presupuesto total di Gobièrnu (5 bion) ta bai na mal maneho i korupshon. Asta rapòrtnan pa ku presupuesto di Gobièrnu di Algemene Rekenkamer i SOAB a demonstrá ku kosnan no a kana konforme prosedura stipulá.

Un parlamentario su trabou ta pa traha pa e pueblo i esaki por entre otro a través di (ahuste) di Lei. TPK ta konsiente ku un persona no por kobra ònderstant pa restu di su bida. Esaki simplemente no ta responsabel i lo tin konsekuensha fatal pa kaha di Gobièrnu. Tampoko TPK ta kere den subida di e montante den un biaha, esaki mester sosodé gradualmente. Promé ku konstatá ku un persona ta yega na remarke pa ònderstant, mester hasi un ‘’assessment’’ promé pa haña un bista di e situashon ku e persona ta aden, i tambe pa haña un bista di su talento i kompetenshanan. Onderstant mester fungi komo algu temporal pa yuda un persona mientras tantu ku e persona en kestion ta trahando riba su mes pa al final e logra haña un trabou, pa asina e por para riba su pia i kria su mes i su famia i asina aportá na pais. 

TPK ta kere den traha riba formashon i edukashon duradero di e kobradó di ònderstant (i/of buskadó di trabou) a través di diferente proyektonan di trabou. Ehèmpelnan manera proyekto di Maal (Oostpunt) ku lo generá 14.000 kupo di trabou, proyektonan den kuadro di agrikultura ku lo generá miles di kupo di trabou, proyekto di Wechi ku tambe lo generá miles di kupo di trabou den konstrukshon (4000 kas), i tambe e parti di kombertí shushi den energia duradero ku lo generá sigur 200 kupo di trabou.

Aktualmente Kòrsou konosé mas òf menos 8000 kobradó di ònderstant i 12.000 persona desempleá. TPK tin proyektonan konkreto kaba por medio di kua e kobradó di ònderstant i/òf e persona desempleá (inkluso e ‘LVB’er’) lo haña e oportunidat di siña i traha al mismo tiempo, kual al final lo yuda forma e grupo aki pa asina nan por subi merkado laboral despues. Konforme Calmes e meta ta pa baha e kantidat di kobradó di ònderstant.

Konforme Calmes esaki lo nifiká un bahada drástiko den kostonan sosial di Gobièrnu kual lo resultá den mas sèn den kaha di Gobièrnu ku lo por invertí den otro proyektonan ku lo yuda stimulá e ekonomia di Kòrsou a largo plaso


Reader's opinions

Leave a Reply

Your email address will not be published. Required fields are marked *