Current track

Title

Artist


Minister Croes ta komemorá Luna di Scouting

Written by on 23 April, 2021

Willemstad, 23 di aprel ta dia di San Jorge, ku ta dia tambe ku scouting rond mundu ta selebrá e dia aki, komo dia pa renobá nan promesa komo scouting.

Minister di Enseñansa, Siensia Kultura i Deporte Sr. Steven Croes, tambe ta para ketu i komemorá e dia aki.

Ya pa 90 aña Scouting ta formando hubentut na Kòrsou. Den transkurso di e añanan aki mas ku 150.000 hóben a pasa un aña òf mas di nan bida komo Scout.

Na aña 2014 gobièrnu di a proklamá luna di aprel komo luna di Scouting. Kòrsou ta enfrentando retonan grandi, en partikular relashoná ku desaroyo di nos hubentut. Hóbennan no ta yegando na realisá nan potenshal i ta rekurí na alternativanan superfisial pa yena e bashí ku nan ta sinti. Scouting ta kontribuí na desaroyo di nos hubentut uzando un sistema di balor basá riba e Promesa i Lei di Scout. Ku esaki Scouting ta yuda krea un mundu mihó kaminda hendenan ku un balor propio haltu ta hunga un ròl konstruktivo den komunidat. Scouting ta kere ku konopando forsa di hinter komunidat, e impakto di e trabou aki ta keda maksimalisá.

Apesar di e situashon ku ta stroba aktividatnan kustumbrá di Scouting, den e luna di Scouting aki Gobièrnu ke duna rekonosementu na e movementu di Scouting pero tambe na tur e hóbennan Scout na Kòrsou i nan esfuerso pa ta un mihó siudadano mañan Dios ke. Na mes momentu esaki ta duna Scouting un oportunidat pa sali dilanti pa promové e movementu i e balornan ku e ta para p’é.

Dikon aprel? Ya pa hopi aña Scouting ta selebrá dia di San Jorge. E leyenda di San Jorge (Sint Joris) ta ser hopi uzá komo ehèmel pa Scoutnan. Dia di San Jorge mes ta dia 23 di aprel. E dia ku Scoutnan ta renobá nan promesa. Kada sekshon di edat tin na vershon di e Promesa pero e esensia di tur ta meskos, esta;

– Kumpli ku mi deber pa ku Dios i mi pais.

– Yuda tur hende tur kaminda ku mi por

– Obedesé lei di Scout.

Minister Croes ta konsiente e impakto grandi ku partisipashon den un organisashon di scouting di riba formashon di un mucha i/òf hoben i ta enkurashá esaki tambe na tur mucha/hoben pa forma parti di un organisashon di scouting.

Minister Croes ta felisitá tur miembro di scouting den nan luna espesialmente dia 23 di aprel riba dia di San Jorge.


Reader's opinions

Leave a Reply

Your email address will not be published. Required fields are marked *



%d bloggers like this: