Current track

Title

Artist


Kòrsou a haña un teater nobo

Written by on 28 May, 2021

Willemstad-Stichting Teatro KadaKen i Fundashon Birgen di Rosario a uni forsa pa restorá e Aula na Habaai manera e tabata den su tempu di gloria. Lo transformá e presioso sala den un espasio inspirativo pa presentashonnan i kreadónan di teater ta mas ku bon biní pa krea ekspreshonnan artístiko.

Ultimo añanan, Teatro KadaKen tabatin su sede den e espasio dinámiko-kreativo di Casa Moderna i seguidamente den teater La Tentashon, kaminda a krea e obranan Mula di kreadó di teater, Albert Schoobaar i direkshon final di Milushka Birge i tambe Chakutoe di kreadó di teater Gibi Bacilio. Na yanüari 2021, Teatro KadaKen a drenta un aventura nobo i duradero ku Fundashon Birgen di Rosario i a haña un kas nobo den e di teater Aula di Habaai. Direktiva di Teatro KadaKen ta ansioso pa yen di ánimo i ku hopi entusiasmo, hinka un bida nobo den e Aula huntu ku Fundashon Birgen di Rosario. Huntu, e fundashonnan ariba menshoná lo sòru pa renovashon di e Aula pa asina pèrkurá pa konservá e pida akí di nos historia. Mientrastantu, Teatro KadaKen ta ful okupá ku sosten di proyektonan artístiko ku lo tuma lugá den e sala den un futuro serkano. Banda di manehá e Aula, Teatro KadaKen lo ofresé un kas tambe na kreadónan i kreadónan prinsipiante di teater pa produsí obranan teatral i otro obranan artístiko. Tur esaki ta bai sosodé meimei di un komunidat di bibienda ku sigur nos lo interaktá kuné i ku lo fungi komo inspirashon pa nos.

Hopi hende lo mester ta kòrda e Aula di presentashonnan teatral, shownan musikal i komedianan ku a tuma lugá einan pa añanan largu. Ku hopi plaser, habitantenan di Habaai i ansianonan di den bisindario, regularmente tabata asistí na aktividatnan ku tabata organisá den Aula.

Asina tabata selebrá kumpliaña di e ansianon un bia pa kuartal den e Aula tambe, meskos ku e selebrashonnan anual di pasku.

Ban un ratu bèk den pasado. Na 1930 a añadí un ala nobo na banda drechi di Huize Welgelegen, ku na piso abou, un presioso sala grandi ku podio i tribuna. For di 1867 te ku 1940, Landhuis Welgelegen tabata e internat di mas dèftu di hinter Sur-Amérika i Karibe i tabata pa mucha muhénan for di e asina-yamá sírkulonan superior. P’esei e penshonat tabatin tur sorto di fasilidat, manera entre otro un Aula, pisina, kancha di tènes, sala di pinta i un sala grandi ku e akomodashonnan nesesario pa siña e arte kulinario.

Na añanan ‘70 i ‘80 a habri e Aula pa skolnan den bisindario sigui entre otro lèsnan di drama. Gruponan di scouting tambe a bishitá e Aula ku basta regularidat. Despues djei, Skol di Teater Hubenil, DRAZANS tambe tabata aktivo den Aula for di 2009, dor di entre otro duna hóbennan lès einan despues di ora di skol.

Kuater aña i mei pasá, Fundashon Birgen di Rosario a haña un direktor nobo, sra. Indra Rossen-Lucasius. Despues di a risibí un guia den e teater, ku mientrastantu tabata uza komo lugá di warda i dùmp kos, el a mira beyesa di e teater, meimei di tur e potoshi i e podio ku a te hasta desmantelá. Ku yudansa di personal di Kazèrna di Marina na Parrera, a organisá i deshasí di potoshi na kuminsamentu di mei 2018. Huntu ku esei, Maduro & Curiel’s Bank a hasi un bunita kontribushon i na 2019 a renobá tur e bentananan di e ala patras. Na 2018 i 2021, Fundashon Birgen di Rosario mes tambe a invertí den drechamentu di e flur di palu, e dos balustradanan, restorashon di e podio, ordenashon di e ofisina ku tin part’i patras, drechamentu di e tualètnan i sòru pa un man di fèrf den e teater. Un ke otro, pa bolbe prepará e Aula pa uzo.

E echo ku Teatro Kadaken a aserká Fundashon Birgen di Rosario na 2018 tabata un bon motibu pa Fundashon Birgen di Rosario start e proseso pa konsiderá Huize Welgelegen (pues inkluso e teater) komo monumento. Esaki ta nifiká ku den futuro lo krea e posibilidat pa restorá un ke otro den estado original.

Fundashon Birgen di Rosario ta satisfecho ku e kolaborashon ku Teatro KadaKen. E Fundashon su aktividat prinsipal ta kuido i banda di esei e ta disponé di un bunita teater, ku bèrdat mester keda restorá urgentemente. Teatro KadaKen ta un eksperto pa loke ta trata arte teatral. Dor di uni forsa, pueblo di Kòrsou por disponé atrobe di un lokalidat ku t’ei pa hóben i ansiano.

Teatro KadaKen tin un relashon spesial ku e Aula. Na 2009, Teatro KadaKen, bou di guia artístiko di Albert Schoobaar a presentá su promé obra titulá ‘E dekonstrukshon di Edsel K…’ (direktor di esena Silvia Andringa) den e teater akí pa skolnan i pa públiko en general. Despues di bishitá e Aula na 2020, direktiva a namorá dje lokalidat i ta mira e espasio akí komo e sitio adekuá pa presentá artenan di podio, manera presentashonnan teatral, presentashonnan di baile, kanto, poesia i spoken word, pero tambe lès di drama, lès di baile i produkshon di video. Lo hür e sala ku terser partidonan tambe pa presentashonnan riba tereno di artenan di podio.


Reader's opinions

Leave a Reply

Your email address will not be published. Required fields are marked *



%d bloggers like this: