[There are no radio stations in the database]

Gobièrnu di Kòrsou, Fundashon Kas Popular (FKP) i tur esnan ku ta bini na remarke pa hür di un kas sosial

Written by on 18 February, 2021

Djamars 16 di febrüari 2021 ta marka un dia históriko pa tantu Gobièrnu di Kòrsou, Fundashon Kas Popular (FKP) i tur esnan ku ta bini na remarke pa hür di un kas sosial. Despues di kasi 40 aña, tin akuerdo entre Gobièrnu i FKP pa loke ta trata e montante ku FKP mester risibí pa mantenshon di e kasnan di Gobièrnu. Komo persona, e nesesidat di un kas òf mihó bisa tin un dak riba bo kabes, ta un nesesidat básiko. Pa por kumpli ku esaki, Gobièrnu ta pone tereno disponibel pa esnan ku por konstruí nan mes kas i tambe pone fondo disponibel pa konstruí bibienda pa e klase sosial. Den e kuadro aki, Fundashon Kas Popular a keda instituí na aña 1979 i tin entre otro komo tarea, maneho di kasnan di Gobièrnu. Na e momentunan aki, nos ta mira ku e demanda pa bibienda sosial riba nos isla a bin ta krese den transkurso di añanan i ta muchu mas grandi ku loke Gobièrnu por proveé.Apesar di e situashon aki por bisa ku aktualmente FKP ta manehá mas ku 1200 bibienda pa Gobièrnu Pa por hiba un mihó maneho ku ta redundá den mihó servisio pa hürdó di e kasnan aki, Gobièrnu di Kòrsou a yega na e akuerdo menshoná ku FKP.Pa e área di mantenshon, Minister di Tráfiko, Transporte i Planifikashon Urbano Zita Jesus-Leito den representashon di Gobièrnu, a firma e akuerdo ku ta fiha e guia i kriterionan pa mantenshon di e kasnan dor di FKP. Den e akuerdo tin entre otro stipulá ku lo hasi un investigashon pa asina midi e kondishon aktual di estado di e kasnan. Esaki lo forma base pa e normanan di prestashon di parti di FKP pa ku maneho i mantenshon di e kasnan di Gobièrnu. Pa Minister Jesus-Leito servisio na kliente ta di suma importansia i e ta di opinion ku esaki ta un stap grandi pa logra mihó maneho di bibienda sosial na Kòrsou. Tambe e situashon di bida di e hürdó lo bira mas grandi, dor di mantenshon struktural di e bibiendanan aki.Sr. Arthur Con, ken ta direktor di FKP, ta sumamente satisfecho ku porfin a yega na e punto ku e akuerdonan aki ta riba mesa. Di e forma aki, FKP por brinda un mihó servisio na su klientenan, komo ku tin palabrashonnan pa fiho pa loke ta trata mantenshon di bibienda entre FKP i Gobièrnu di Kòrsou.


Reader's opinions

Leave a Reply

Your email address will not be published. Required fields are marked *