Current track

Title

Artist


GOBIERNO DI ARUBA A ANUNCIA KANTIDAD RECORD DI 119 KASO POSITIVO DEN UN DIA

Written by on 7 August, 2020

Un rato pasa Minister Presidente mr. Evelyn Wever-Croes a anuncia cu di ayera pa awe mainta, a haya un cantidad di 119 test positivo pa e virus Covid-19 na Aruba. Na tur a haci 829 test entre ayera pa awe mainta, un otro record den cantidad di testnan haci den un solo dia! Cu esaki e total di casonan positivo na Aruba a alcansa 382.

Gran parti di e personanan contagia no ta mustra ningun sintoma y no tin ningun pashent interna den Hospital ainda. Pues ningun hende ainda ta den un situacion cu ta rekeri atencion medico avansa.

“Cu esaki mi kier haci un apelacion riba henter e comunidad di Aruba, cu esaki t’un momento pa mustra disciplina. Nos ta drentando fin di siman y nos mester keda paden, mas paden cu ta posibel. Corda cu tin e regla di samenscholingsverbod, pues si Polis mira Bo riba caya cu un grupo di mas cu 4 persona, lo kibra e grupo for di otro”, asina e prome mandatario a bisa.

El a haci un apelacion tambe pa hunto nos cuida esunnan mas vulnerabel den comunidad, manera por ehempel esunnan riba 65 aña di edad, esunnan cu problema di pulmon, diabetico, riñon, presion halto, asma, etc. Mester cuida nan extra miho pa evita cu nan ta contagia cu e virus, pasobra nan si lo rekeri mas asistencia medico. “Nos no sa si nos por duna tur e asistencia, si hopi hende bira malo pareu”, asina Minister Presidente a bisa cu un bos serio.

Gobierno a termina bisando cu nos ta prepara pa e ola di casonan aki. Ta pesey por a maneha mas di 800 test den un solo dia. E ta pidi sosten y cooperacion di comunidad den esaki, pa hunto nos baha e cifranan aki atrobe.


Reader's opinions

Leave a Reply

Your email address will not be published. Required fields are marked *