Current track

Title

Artist


Eugene Rhuggenaath ta Splika dikon e no ta den e Parlamentu nobo

Written by on 11 May, 2021

WillemstadCuracao-Mi tuma un mainta den solitut pa asina awe mi por reflekshoná i enfoká riba e ròl ku mi ta mira pa mi mes den polítika i komo lider.4 aña pasa mi a logra haña 15000 voto personal, ku a pone mi riba e stul di Minister President. Durante 4 aña mi a goberná huntu ku mi gabinete na bienestar di nos pais i esei mi a hasi i ta hasi ainda ku hopi orguyo. Algu ku nunka mi a imaginá. E tarea tabata enorme: sòru pa un gobièrnu stabil, pa asina por pone fundeshi pa konstruí Kòrsou pa ku futuro, kaminda tur hende por realisá nan máksimo potensial. Mirando bèk, e 4 añanan no tabata fásil. Durante e 4 aña sinta komo MP bo ta mas serka di tur kos. Tur kos ta bira mas evidente i bo ta siña adaptá na sirkunstansianan, evaluá i re-dirigí e rumbo pa asina tòg nos yega na e destinashon ku nos ke yega … Un Kòrsou próspero.Un Kòrsou próspero, den kua tur hende ta igual i tur hende por partisipá. No ta importá unda bo a nase, lantá, biba, bai skol i ken bo konosé. Un Kòrsou den kua tur hende tin mesun oportunidat pa ta eksitoso, por ta felis i por aportá na kontruí Kòrsou. Un Kòrsou ku ta un.‘Fast forward’ bai 2020. Un aña ku a habrí ku perspektiva pa kresementu, pero en bes di esaki e pandemia di Covid 19 a hasi su entrada. Un suseso ku sigur no a yuda e kaminda ku Kòrsou tabata bayendo. Tur kos a bira mas evidente i bo ta drenta mes ora den un “Crisis-mode”, manera nan sa bisa. Desishonnan ku mester wòrdu tuma i no semper nan ta esun mas popular. Den tur desishon mi ke enfatisá ku mi a tuma nan despues di a konsultá ku mi koleganan, nos ekspertonan i tambe stakeholders. Kisas no tur desishon tabata perfekto, pero semper tabata balansá i bon fundá i mas ku tur kos mi tabatin den mente e bienestar di nos hendenan i nos pais.2020 pa hopi hende tabata un aña di reto, kontratempu i tambe reflekshon i esei ta konta pa ami tambe.19 Mart último, pueblo tabatin oportunidat pa husga mi trabou i a resultá 8500 persona a vota pa ami. Sinseramente, aunke mi a akseptá e resultado i a felisitá esnan ku a sali viktorioso, e tabata un realidat un poko difísil pa traga. Tòg, en bes di laga esaki deskurashá mi, mi a us’e pa drenta den diálogo ku personanan serka di mi , pero tambe otronan pafó di mi sirkulo. Esaki a pone mi pensa aún mas, di ki manera mi por sigui sirbi mi pais i nos hendenan mas mihó? Kon mi por sigui aportá i ta mas balor pa futuro di nos pais?Den 2017 mi a subi lista di PAR komo no 1, lider polítiko di PAR. Den e ròl aki mi meta tabata pa trese un dinámika nobo den partido i den gobièrnu (#onthemove), demonstrá un liderazgo di harmonia i union (#huntu) i dal pasonan pa krea un partido i lidernan pa e siguiente 25 di PAR, pa mi partido keda relevante i aportá na bienestar pa siguiente generashonnan di yunan di Kòrsou. Mi a keda sin drenta Parlamento pa mi dediká mi mes na netamente esaki. Danki pa e komprenshon i sosten. Eugene Rhuggenaath.


Reader's opinions

Leave a Reply

Your email address will not be published. Required fields are marked *



%d bloggers like this: