[There are no radio stations in the database]

Coraline Kooistra a entregá retiro for di partido Maneho Asertá Visibel i Sigur (M.A.V.I.S.)

Written by on 12 February, 2021

E motibu prinsipal i úniko di mi desishon ta sintá na e echo ku for di dia ku mi persona a disidí di djòin politika, esaki a afektá e fundashon ku mi ta presidí, esta Stichting Tegen Kindermishandeling enormemente. Mi a djòin politika ku e meta pa trese un kambio i mehorashon na e fórma kon aki na Kòrsou nos ta anda ku derechinan di e mucha, di hende hòmber i hende muhé i loke ta hopi na mi kurason: e derechinan di animal. Un di e formanan ku mi partisipashon na politika a afektá e fundashon ta entre otro e tempu ku tin ku bai pa dediká na bo partisipashon riba lista i e otro motibu ta e parti finansiero. Komo un fundashon ku no ta risibí supsidio di Gobièrnu, Stichting Tegen Kindermishandeling su eksistensha i trabounan na komunidat inkluso e proyekto konosí di Crisis Bank ta dependé únikamente di e sostén di komunidat. Diferente persona i kompania ku sa sostené e fundashon a anunsiá na nos ku nan lo tuma un ‘break’ pa motibu di mi afiliashon na un partido politiko. E break aki a bin afektá e fundashon voral e proyekto di Crisis Bank enormemente ya komo sin e medionan finansiero no ta posibel pa distribuí kuminda na famianan den nesesidat. Esaki ta pone ku mi mester a hasi un eskoho. Mi eskoho mester a bai pa e fundashon komo e fundashon ta sirbi interes i bienestar general di mi pais, eata yudansa na viktima i na famianan ku ta sufri hamber. Pa e motibu aki mi mester a tuma e desishon no fásil pa bandoná e partido i sigui dediká na e fundashon pa asina e fundashon por sigui sali manera debe ser na defensa i bienestar di esnan menos pudiente.Manera mi a indiká anteriormente mi no tin ‘regret’ di ningun forma di a djòin politika. Kontrali. Mi a siña hopi i mi a mira djaserka kon e sistema i e politiko ta funshoná. Además di esaki, mi tabata pertenesé na un partido sin mancha, ku hende inteligente ku sin invertí den material di propaganda a manda e mensahe bon klá na komunidat ku Kòrsou mester di un kambio. Mi ta nada mas ku orguyoso di por a forma parti di e partido M.A.V.I.S. Mi ke gradisí tur hende di e partido pa algun luna fruktífero huntu. Mi ta kontentu di por a konosé boso. Mi ta deseá Mavis Albertina i kada unu di boso hopi sabiduria i mi ta sigur ku den futuro boso lo tin éksito. Kontinuando ku mi labornan di yudansa na viktima, mi ta mira mi dilanti un temporada yená ku desafio tantu pa e fundashon kontra di abuzu di mucha komo pa pais Kòrsou. Pais ta pasando su momentunan di más difisil den historia i komo un fundashon ku ta sali pa e viktima di abuzu i negligensha e ta rekerí di nos pa hasi más i duna más, voral mirando ku viktimanan ta sigui oumentá. Ta hopi trabou tin. Pa e motibu aki nos no por tuma ningun riesgo pa motibu ku esaki por i lo tin su konsekuenshanan. Stichting Tegen Kindermishandeling Curacao lo sigui hasi lo máksimo pa sigui sirbi su pais. Un biaha más: Danki.

Firmá: Coraline Kooistra

Kòrsou, 11 di febrüari 2021.


Reader's opinions

Leave a Reply

Your email address will not be published. Required fields are marked *