Current track

Title

Artist


Atleta nan di Korsow a saka kara na e “Battle of Muay Thai Aruba”

Written by on 10 September, 2019

WILLEMSTAD – Djasabra ultimo, Korsow a wordu representa pa 4 atleta den e “Battle of Muay Thai” aja na Aruba. Ta trata aki di Zidan Attaf, Shurten Baromeo, Ronin Prince di e skol ATTAF FIGHTING FACTORY I tambe Christopher Elliot di e skol PRO FIT.

Den e prome pelea di anochi, Zidan Attaf di Attaf Fighting Factory, a enfenta Sergio Tromp di Aruba. E kombate aki a bai entre e dos hoben nan di apenas 10 anja, ku a habri e anochi ku un bataya fuerte kaminda e publiko a gosa di dje. E triumfo a bai pa e Rubiano, ku no tabata tin e fasil kontra nos pugil di Korsow.
Den e di dos kombate pa Korsow, Shurten Baromeo di Attaf Fighting Factory, a enfrenta Kieyon Henriquez di Aruba. E atleta di Aruba aki a sali di un manera brutu riba Shurten, pero esaki a sa di domina e atake di e Rubiano I a hinke den problema serio husando teknika nan di rudia i skop nan fuerte na su kurpa. Shurten a gana konvinsentemente di Kieyon.
E di tres atleta di e ekipo di Korsow, Christopher Elliot (di Pro Fit), a bataya kontra di Adrian Florez di Aruba. Christopher a hasi bon uso di su bentaha di largura I a keda wanta e kontrinkante di Aruba riba distansia. Di e forma aki ela domina e pelea den su totalidad I a bai ku e triumfo meresi pa Korsow.
E ultimo pelea di e anochi pa e grupo di Korsow a bai entre Ronin Prince di Attaf Fighting Factory I e pugil di Aruba Victor Hernandez. Den un bataya hopi fuerte, Ronin Prince a mustra superioridat kaminda ela hinka e Rubiano sigur 3 bia durante e pelea den hopi dificultat. No tabata falta muchu pa Ronin por a kaba su pelea den un knock out. Sinembargo e pelea a termina I Ronin a gana pa desishon unanime.

Entrenador Renato Haseth, ta sumamente satisfecho ku e resultado nan aki. Spesialmente e dos hoben nan, ku e ta preparando pa e kompetensia nan di e kampionato Panamerikano den November proksimo, ta mustrando desaroyo nan grandi. “Pa ami, esaki ta muestra ku nos ta jegando un nivel kaminda nos por kompara nos mes ku e pais nan grandi. E 2 hoben nan aki ta hibando un preparashon hopi intensivo for di komienso di e anja aki, I nan desaroyo ta hopi bisto” Renato a agrega. E 2 hoben nan aki sigur tin un futuro pa loke ta e deporte aki, si nan sigi den e forma aki. Ta trata di 2 hoben di respektivamente 17 i 18 anja ku ja ta riba un nivel internashonal.



Reader's opinions

Leave a Reply

Your email address will not be published. Required fields are marked *